Ба 10 оилаи деҳаи Баррӯшони ноҳияи Рӯшон, ки хонаҳояшон бар асали омадани селе дар моҳи июл пурра хароб шуда буд, манзилҳои нав додаанд. Калиди ин хонаҳоро рӯзи 30-юми сентябр Шарифхон Сафарзода, раиси ВМКБ ба соҳибонашон тақдим кардааст.
Сели харобиовар дар Рӯшон моҳи июл фаромада буд, ки дар пайи он 40 хона зарар дида буданд, аз ҷумла, 10 хона пурра ва 13 манзил қисман вайрон шуда, 13 манзили дигар осеби сабук диданд.
“Хонаҳое, ки қисман зарар диданд, барояшон замин барои сохтмон ва масолеҳи бинокорӣ барои сохтмони хона дода шуд. Хонаҳое, ки зарари сабук диданд, ба таври пурра тоза карда шуданд”, – гуфта мешавад дар хабари расмӣ.
Дар маҳалли хонаҳои наве, ки ба сокинони осебдида тақдим шуд, деҳаи наве ба номи Истиқлол бунёд шудааст. Қарор аст дар он мактабу кӯдакистон ва майдончаи варзишӣ сохта шавад.
Ёдовар мешавем, ки рӯзи 21-уми июл дар деҳаҳои Баррӯшон ва Деҳрӯшони ноҳияи Рӯшони ВМКБ сел фаромада, ба 40 хона зарар расонида буд.
Ҳукумати ВМКБ сабаби омадани ин селро якбора баланд шудани ҳарорати ҳаво ва обшавии босуръати пиряххо гуфта, иттилоъ дода буд, ки дар натиҷа, “дар деҳаи Баррӯшон 10 хонаи истиқоматӣ пурра, 6 хона қисман ва 14 хона ба таври сабук, дар деҳаи Деҳрӯшон бошад, 4 хонаи истиқоматӣ қисман ва 6 хона ба таври сабук осеб дидааст, ки дар маҷмуъ 40 хонаи истиқоматиро ташкил медиҳад”.
Мақомот гуфтаанд, ки ба дастури раисҷумҳури Тоҷикистон, “ба ҳар як оилаи зарардида дастгирӣ ва барқарорсозии манзилҳои истиқоматӣ амалӣ мегарданд”.
